Aldi-Sub

(Der Text ist zwar schon etwa 20 Jahren her, habe ihn dennoch mal aus meinem Fundus gekramt und hier reingestellt. Wer des hessischen beziehungsweise wohl eher Frankfurter Dialektes nicht mächtig ist, der hat wohl leider Pech gehabt)


Hier, isch wollt Eusch mol unbedingd was erzähle hier. Also, passt’e mal uff, des wor vor zwaa Woche oder so, kann awwer aach drei gewese sei, des waas isch jetz nemmer so genau. Also hier, da hadde Aldi widder mal so e sachehafdes Angebot gehabbt. E lebendische Sglaavin fer läscherlische neunhunnerdfinfunneunzisch Oiro. Gud, die wo’se hawwe abgebilded, die hadd mir jetz net sooo zugesacht. Abber da stand ja druff uffm Prospeggd, dasse verschiedene Variande hawwe tun. Hier, da habisch mer doch gesacht, komm Maddin, jetz holste der endlisch mal aa. Wolldeste doch schon immer mal hawwe. Unn wennse hald nix daucht, dann gebbischse hald widder reddur. Ja was glaabt dann ihr, ich bin doch en schlaue Kerl, da mach ich glad von maam Rückgabberecht gebrauch. Ei, ich waas doch schliesslisch net, ob die aach iwwerhaabt uff mich hörn dud. Nachher habisch da so e Schlamb an de Baa, unn isch waas nemmer, wo ich se hi due soll.

Jetzt haddisch des Prospegd erstemal em Kumpel gezeischt. Der kennt sisch nämlisch mit sowas aus, sach isch eusch. Des war aach ganz gut so. Nämlisch der hat gleisch gesacht, das isch da ganz früh bei deene vor de Dür stehe muß, am beste noch bevor die iwwerhaapt uffmache. Weil bei so’m Hammer, hat der gesacht, da sinn die Dinger so schnell fort, so schnell kannste gar net gugge. Da hab ich mir gesacht, Maddin, du bist e schlau Kerlsche, also gehste zwaa Minude frieher hi, als wie se uffmache dun. Als ich des gemacht hab, hier ich saach eusch, da hat misch fast de Schlaach gedroffe. Ei hier, her doch uff, isch bin ja netemal uff den Parkplatz druff gekomme. Ich kann eusch saache, isch war sowieso schon so uffgerecht von dem ganze, und dann noch so’n Scheiss. Wergglisch jetzt, mer hat vor lauder Zelde und Wohnmobile gar net mehr de Aldi gesehe.

Also hier, als isch den Volksfestufflaaf gesehe hab, bin isch erstemal gleisch widder reddur gefahre, weil mit Parkplatz, des konnste vergesse. Aber hier, isch bin widder gekomme ... mid’m Taxi, so isset net, gell? Unn hier, nochwas ... des war mei Glick, das ich mei eische Audo net dahi gestelld hab. Hier, ich sach eusch, was daa rumgelaufe iss, e Volk ... Tüpe ... hier escht jetz, dene möschd isch nachm Ladeschlussgesetz net begeschne. Ei hier, da war aaner mit so’nem schwazze Jagua, der hat aach noch lauder Kedde um sisch rum gehabt. En annern hat ausgesehe wie de Henker persenlisch. Da iss mer rischdisch schlescht gewornn.

Jedefalls hab isch jetz mal versucht, da neizukomme in den Lade. Hier, her blos uff. Die hawwe ja bis vor de Dür gestanne. Isch hab dann nur geheert, wie aaner gesacht hat, das die nur drei odder vier Stück von dene Sglaavinne gehabt habbe. Ja ... scheiße hab ich dann gesacht ... unn warum geht des dann hier net weider? En annern hat dann gerufe, das de Scheff von dem Lade allaans kassiere muss, weil die Verkäuferinne aach schon verkaaft worrn sinn. Na herrlisch, hab isch mer gedacht. Aber hier, wenn’der glaabt, das isch aafach so uffgeb, dann habt’er eusch geteuscht. Isch bin de Maddin, isch geb net so aafach uff, gell. Als ich nemmlisch in dem Lade endlisch mal drin war, hab isch ganz hinne in de äuserst Egg noch aa erwischt von dene Weiber. Echt jetz, die misse’se allmiddenanner iwwersehe habbe. Aber isch, de Maddin, isch hab se gefunne. Ihr glaabt doch, das isch net lang überlescht hab, die Schlamb iwwer die Schulder genomme und vormarschierd. Aber weid bin isch net gekomme. Da hat misch doch aaner von hinne dermaase angeschrie, sach isch eusch, da hab isch’s escht mit de Angst bekomme. Ei, isch hab erst gedacht, des war aaner von dene unheimlische da drauße. Isch hab noch gekrische: „Hau ab du Dreggsack, die iss mir“. Was’n Scheiß hier hier, des war de Scheff von dem Lade, der hat als nur gebrüllt, isch soll endlisch sei Butzfraa loslasse.

Ei ja, isch war dann doch e bissi endäuscht, weil, isch hätt halt aache mal endlisch gern e bissi gehaache. Mein Großvadder hadd mer frieher schon immer gesacht, die Weiber, die muss mer allesamt verprüschele. Unn was mein Oppa frieher immer gesacht hat, des hat eischentlisch immer gestimmt. Isch hab die ganz Schtori dann am Aamd noch meim Kumbel erzählt, der hat nur gesacht, isch soll mer nix draus mache. Des mit deene Subbis, so hadder gesacht, iss jetz in Mode unn die wern jetzt nach und nach alle uffn Markt geschmisse. Unn die dete bald aach billischer werrn, weil des wär wie mit de Combjuder. Erschendwann hawwe se alle die Fress voll von dene Dinger und könnese nemmer sehe. Demnächst solle die sogar schon im Baumarkt verkaaft werrn und aach an de Tankstell. Letzderes wär allerdings e fei Sach. Beim Danke tu isch in letzder Zeit immer Punkde sammele, viellaascht kammer des ja dann verreschene.

Also, gugge mer mal. Gude.